juni 30, 2004
Egyptaland!!!
Jæja, ég er farin í sandkassann að leika! Það mun ekkert heyrast frá mér næstu vikuna, því ég verð í Rauða hafinu að kafa og sleikjandi Afríkusólina þess á milli.
Hafið það gott!
juni 29, 2004
MEYJA 23. ágúst - 22. september
Þér hættir til að vanmeta hæfileika þína og afrek. Reyndu að venja þig af þessu.
Meyjur eru gjarnan auðþekkjanlegar af háum kollvikum, en þá ekki síður stórum og hreinum augum. Þær klæða sig tilgerðarlaust og smekklega, en elta ekki endilega nýjustu tískugrillur. Þær eru hagsýnar og duglegar, en lítið gefnar fyrir langar og hugmyndafræðilegar samræður og vilja miklu frekar láta verkin tala. Meyjur vilja helst vera á fartinni, ekki þó stefnulaust heldur að sinna einhverjum verkefnum. Líkt og önnur jarðarmerki eru þær holdlegar og veraldlegar, en beita orku sinni yfirleitt á hagnýtan og vinnutengdan hátt. Þær hafa mikla skipulags- og aðlögunarhæfileika, en eru haldnar fullkomnunaráráttu og geta búið yfir óhóflega mikilli sjálfsgagnrýni og smámunasemi. Meyjur hafa rökfasta hugsun og oft hvassa tungu, og þær eiga bágt með að þola hirðuleysi og slóðaskap. Þær eru áreiðanlegar og hjálpsamar og fúsar að vera öðrum innan handar. Meyjum lætur ágætlega hjúkrun og reyndar hvert það starf sem krefst nákvæmni og sjálfsaga, t.d. úrsmíði eða tölvuvinna af öllu tagi. Þær eru smekkvísar og gætu gert það gott sem fatahönnuðir eða í listiðnaði, helst þá þeim greinum þar sem notuð eru jarðarefni, t.d. við leirkeragerð eða textílvinnu. Meyjan ætti að sinna betur ímyndunaraflinu og láta stundum eftir skyndilegum hugdettum í stað þess að láta skynsemina alltaf ráða ferðinni og einblína stöðugt á vinnu. Þannig gæti hún náð betra andlegu jafnvægi.
Elli bróðir var að senda mér þetta, því honum fannst þetta vera algjör lýsing á mér! Ég verð nú bara að viðurkenna að það er nokkuð til í því hjá honum.
Sumarfrí !!!
Annars, þá er það helst að frétta að ég kláraði síðasta prófið í gær og gekk mjög vel. Eftir prófið þurfti nánast að toga mig niður úr skýjunum, því einkunnirnar úr fyrsta prófinu voru komnar og ég fékk 11, sem var hæsta einkunnin. Reyndar þá gekk mér verst í þessu fyrsta prófi, þannig að það lítur vel út með hin tvö sem ég á eftir að fá einkunnir úr.
Eftir prófið fékk ég mér nokkra øllara með vinum mínum úr eðlisfræðideildinni, því þeir voru líka að klára prófin í gær. Ég fór síðan beint í klippingu og svo út að borða á Eydes með Anne og Elin í gær. Við borðuðum á okkur gat og enduðum svo gott kvöld með því að fá okkur eina könnu!
jæja, ég hef ekki tíma til að skrifa meira núna, því ég er að fara í mat til Ninu vinkonu minnar og svo þarf ég að þvo og pakka niður fyrir Egyptalandsferðina.
juni 25, 2004
Sól, sól skín á mig (bráðum)!
Eftir sex daga flýg ég til Luxor og verð svo í eina viku í Marsa Alam að kafa!!!
Svona til samanburðar... Reykjavík, Odense
juni 24, 2004
Eftir eina viku...
...verð ég rétt að koma til Marsa Shagra við Rauða hafið, eftir flug frá Køben til Luxor og akstur í gegnum Arabísku eyðimörkina!!!
Ég get varla beðið, en fyrst þarf ég samt að klára síðasta prófið á mánudaginn. Ég á frekar erfitt með að einbeita mér, því mig langar mest bara til að sofa og horfa á EM, þannig að tíminn líði sem hraðast.
juni 23, 2004
Hversu óheppinn getur maður verið ???
Ég var í næstsíðasta prófinu í morgun og bara allt gott um það að segja nema að mér tókst að brjóta gleraugun mín korter fyrir próf. Ég var að pússa gleraugun í rólegheitunum, þegar umgjörðin bara allt í einu brotnar í tvennt yfit öðru glerinu. Nú voru góð ráð dýr, því ekki gat ég verið gleraugnalaus í fjögurra tíma prófi. Ég spurði því gamlingjana, sem áttu að sitja yfir okkur í prófinu, hvort þau væru nokkuð með límband, því gleraugun mín hefðu brotnað. Þau voru náttúrulega ekki með neitt, en ein voða krúttuleg gömul kona kom með mér að leita að einhverri opinni skrifstofu, sem við svo fundum. Þar var heldur ekkert límband en konan sem var þar klippti ræmur af hvítum límmiðum sem hún var með, svo ég gæti a.m.k límt gleraugun saman. Það var ekki hjá því komist að límmiðinn næði yfir hluta af öðru glerinu og gamla konan vorkenndi mér voða mikið því hún var svo hrædd um að þetta myndi trufla mig í prófinu. Ég er hins vegar svo heppin að vera hálfblind, þ.e.a.s með mjög litla sjón á öðru auganu og það var einmitt þeim megin sem gleraugun höfðu brotnað, þannig að þetta truflaði mig ekkert mikið þó að ég gæti samt alveg séð þetta.
Gamla konan fór að tala við hina verðina og kom svo til mín og sagði að ég gæti farið í betjentstuen og athugað hvort þeir væru með eitthvað betra límband. Nú voru ekki nema um tíu mínútur í próf og betjentsuten frekar langt í burtu þannig að ég var ekki alveg viss, en sú gamla sagði að ef prófið yrði byrjað þegar ég kæmi til baka þá ætti ég bara að læðast inn og svo fengi ég að vera lengur, hún væri búin að ræða það við hina verðina. Ég hljóp því alla leið niður í betjentstuen og fékk límband sem var lítið betra en hvíti límmiðinn, skellti því á gleraugun og hljóp svo tilbaka og var komin nokkrar mínútur í próf. Allir voru komnir inn í stofuna og sestir en ekki búnir að fá prófið ennþá. Þegar ég settist við borðið kom önnur gömul kona til mín og spurði hvort þetta væri í lagi og ég sagði að þetta væri allt í fína og setti upp mín fínu samansjúskuðu gleraugu og vonaði bara að þau héngu saman út prófið. Sú gamla var voða góð og hughreystandi og sagði að ég ætti ekkert að láta þetta vesen trufla mig og óskaði mér góðs gengis í prófinu og ef eitthvað vesen yrði með gleraugun ætti ég að láta vita og við myndum reyna að laga þau.
Það er skammst frá því að segja að gleraugun héldu út allt prófið en duttu reyndar í sundur þegar ég var að ganga frá svarblöðunum mínum í lokin. Auk þess tók ég lítið eftir límbandinu á glerinu, enda yfir hálfblinda auganu, sem betur fer.
Eins og þetta gleraugnavesen hafi ekki verið nóg, þá var líka fleira sem gerði mér lífið leitt í morgun. Ég skipti um á rúminu mínu í gær og var svo “gáfuð” að nota sængurverið, sem ég hafði þurrkað úti í síðustu viku þegar grasfrjókornin voru alveg í hámarki, það var meira að segja í fréttunum að magnið af grasfrjókornum hafi farið yfir metið. Nú ég svaf í þessum rúmfötum í nót og var svo hnerrandi hægri vinstri í morgun. Mér tókst meira að segja að hnerra tólf sinnum í röð með um fimm sekúndur á milli hnerra. Ég gerði mér grein fyrir að þetta yrði náttúrulega alveg óþolandi í prófinu, bæði fyrir mig og aðra, svo ég tók ofnæmistöflu og sprautaði nasaspreyi í stórum stíl í hvora nös. Þetta virtist í fyrstu ekkert ætla að hjálpa mér en lagaðist alveg þegar ég kom út í skóla og truflaði mig ekkert á meðan ég var í prófinu.
Þrátt fyrir alla þessa erfiðleika gekk mér nú mjög vel í þessu prófi!!!
2-2 !!!
Ég ætla ekki að gleyma að minnast á hvað mér fannst frábært að leikurinn milli Dana og Svía á EM í gær skyldi fara 2-2 og Ítalirnir skyldu vinna Búlgaríu. Þegar staðan var 1-1 vonaði ég að Danir myndu komast í 2-1 og Svíar myndu síðan jafna á lokamínútunum og það var einmitt það sem gerðist. Mér fannst þetta alveg magnað og ég var í hláturskasti þegar Svíarnir voru að leika sér með boltann eftir jöfnunarmarkið eins og þeir væru að hita upp, á meðan Danirnir bara skokkuðu um á sínum eigin vallarhelmingi. Það er ekki að því að spyrja að samsæriskenningarnar eru að gera allt vitlaust á Ítalíu, hahaha!!!
Fífl !!!
Ég held að maðurinn ætti að einbeita sér að einhverju öðru, kannski vandamálunum heima hjá honum sjálfum! Hér!
juni 22, 2004
Vi er røde, vi er hvide …
…hljómar um allan bæ og allt landið! Það er voða stemming í gangi fyrir leikinn á móti Svíunum í kvöld. Ég var úti í sjoppu áðan og það voru allir að kaupa snakk, nammi og að sjálfsögðu bjór fyrir kvöldið.
Annars þá er ég búin að fylgjast mjög vel með EM, sem hefur alveg haldið í mér lífinu í próflestrinum. Ég held með Dönunum en vona líka að Þjóðverjarnir komist langt, því ég fylgist einna mest með EM á þýsku sjónvarpsstöðvunum, sem eru ótrúlega duglegar að sýna frá mótinu.
Mér þætti best að leikurinn í kvöld fari 2:2, svo bæði Danir og Svíar komist áfram, en Snotti (eins og hann er kallaður eftir að hann hrækti á Christian Poulsen) og félagar verði sendir heim.
juni 17, 2004
Snökt, snökt, snökt,...
Nú er síðasta Sex and the City þættinum lokið! Hvað á ég nú að gera á fimmtudagskvöldum???
En, annars þá vona ég að fólk hafi átt góðan 17. júní. Það var víst ágætis veður á Íslandi, en hér í Odense var bara rigning eins og vera ber á þessum degi. Ég er að minnsta kosti mjög ánægð með rigninguna, því þá minnkar vonandi ofnæmið aðeins á næstunni. Það er hrikalegt að vera að lesa fyrir próf þegar maður gerir ekki annað en að snýta sér og nudda augun.
juni 14, 2004
Pollenallergi!
Já, ég er svei mér þá komin með frjókornaofnæmi! Ég hef aldrei áður fundið fyrir frjókornaofnæmi og bara ofnæmi yfir höfuð, en það er víst ekkert við því að segja, þar sem það er ekki nærri janmikið af frjókornum í íslenska loftinu eins og í því danska. Það er samt skrýtið að þetta komi allt í einu núna, því síðustu tvö sumur hef ég auðveldlega getað setið úti í garði í fleiri tíma án þess að finna fyrir neinu. Núna má ég hins vegar ekki koma nálægt garðinum um miðjan daginn því þá er ég alveg að drepast á eftir. Í gær var ég orðin voða fín eftir að hafa verið mjög slæm föstudag og laugardag, en það var svo gott veður að ég gat ekki stillt mig um að fara aðeins út í garð. Ég fann strax hvernig grasfrjókornin byrjuðu að skríða upp í nefið á mér og í augun. Ég fékk alveg um leið "sdíblad nebb" og tárin byrjuðu að renna úr augunum á mér. Í dag er ég svo búin að vera að borga fyrir þessa stuttu sólbaðsferð með miklum sviða í augunum og að auki mikinn hnerra og stíflað nef. Það er víst alveg ljóst að ég fer ekki út í garð á næstunni!!!
Ég get varla beðið eftir að komast í egypska sandkassann eftir rétt rúmar tvær vikur !!! Ég ætti nú að sleppa alveg við frjókornaofnæmið þar!
Ringluð!
Það er víst ekkert við því að segja að maður geti orðið svolítið ringlaður öðru hvoru þessa dagana. Ég er alltaf lesandi bækur á ensku, skrifandi glósur á dönsku og talandi íslensku í símann. Þegar ég svo tek aflsöppunarpásur horfi ég oftast á þýskar sjónvarpsstöðvar og öðru hvoru á norskar eða sænskar!
Annars var ég rétt í þessu að koma heim eftir að hafa, ásamt nokkrum dönskum vinum, verið að horfa á Danina gera jafntefli við Ítalina á EM í Portúgal. Eins og sönnum dönskum fótboltapartýum sæmir var auðvitað drukkin bjór og pöntuð pizza.
juni 10, 2004
Tvö próf búin og tvö eftir!
Ég kláraði anatómíuna í dag með stæl og get núna slappað aðeins af áður en ég byrja á seinni hálfleik prófatímabilsins. Það var góð tilfinning að koma út úr prófinu í dag, því ég hafði haft fullkomlega stjórn á þessu. Ég dró “endokrine organer” og talaði fyrst svona almennt um þau og hvað einkennir þau, en svo fór ég að tala um einstaka kirtla, aðallega hypofyse og thyroidea og kom líka inn á parathyroidea og svaraði svo auðvitað fullt af spurningum. Ég átti síðan líka að greina sýni í smásjá, en þar sem við vorum búin að tala svo lengi um allt hitt þá ákvað hann í staðinn að láta mig fá EM-mynd af skeletmuskulatur, sem var auðvelt að tala um. Ég missti reyndar óvart útúr mér; “ooo, mig langaði að kíkja á vefsýni!”
Eftir prófið settumst ég og Anne vinkona út í garð við skólann og fengum okkur einn, øllara, af því að það var svo gott veður. Eftir einn grænan og kaldan, hjólaði ég svo með Anne heim til hennar, en hún býr einmitt á Pjentadamsgade, sem verður mitt nýja heimili frá og með miðjum næsta mánuði. Ég gat nú ekki annað en athugað hvort strákurinn sem býr í íbúðinni “minni” væri heima og jú það var hann, þannig að ég fékk að koma inn og kíkja. Ég verð bara að segja að hún er æðisleg þessi íbúð og ég hlakka geðveikt til að flytja!!!
juni 07, 2004
Eitt skref ... ... í áttina að sumarfríinu!
Fyrsta prófinu er semsagt lokið en það stóð yfir frá 14-18 í dag. Ég held mér hafi gengið alveg þokkalega og er alveg sátt við frammistöðuna. Það verður samt bara að koma í ljós hvernig mér gekk, því það er enginn tími til að vera að spá í því enda næsta próf strax á fimmtudaginn.
Núna, er ég bara alveg uppgefin og ekkert við því að segja þar sem ég svaf ekki mikið í nótt. Ég skil ekki hvernig ég fór að því en mér tóksta að vera andvaka í nótt. Ég var annars í góðum fílíng í gær þegar ég fór að sofa, en af því að ég sofnaði ekki alveg strax byrjaði ég að vera hrædd um að nú tækist mér ekkert að sofna þessa nóttina. Eftir nokkurra tíma brölt og byltingar og allar mögulegar og ómögulegar svefnstellingar gerði ég mér grein fyrir að nú þyrfti eitthvað að gerast. Ég mundi eftir að vinkona mín hér í Odense hafði einu sinni sagt mér að þegar hún og kærastinn hennar voru andvaka einu sinni stóðu þau á fætur, fengu sér einn bjór og viti menn þau steinsofnuðu á eftir. Þar sem ég var svo heppin að eiga øl í ískápnum ákvað ég um hálffjögurleytið í nótt að láta slag standa og fá mér eins og hálfan bjór. Þegar ég fór að sofa aftur var ég alveg viss um að þetta myndi virka en þegar ég var aaaaalllllveg að sofna, þá þurfti ég að pissa! Andsk...., þar fór sú fína tilraun með bjórinn! Fljótlega eftir að fór að birta, eða í kringum hálfsex, tókst mér loksins að sofna aðeins en ég vaknaði aftur klukkan hálfníu, því það var orðið svo bjart. Stóð ég þá bara á fætur og fékk mér einn rótsterkan kaffibolla og vonaði að ég gæti haldið mér vakandi í gegnum prófið.
juni 02, 2004
Jæja, jæja, jæja...
Það er víst kominn tími til að skrifa nokkrar línur hér á síðuna, en það er víst eitthvað sem ég hef ekki verið neitt alltof dugleg við að undanförnu. Ég hef nú samt góða afsökun og hún er sú að ég geri ekki annað en að læra fyrir prófin þessa dagana og ég vil ekki vera að þreyta fólk á að tala um námsefnið mitt. Ég held að fólkið heima á Íslandi sé komið með nóg af slíku í bili og sé bara fegið að vera komið í sumarfrí og allir þeir sem eru líka að læra hér í Mörkinni hafa örugglega nóg með sitt.
Annars eru góðu fréttirnar þær að sumarið er komið og sólin er farin að skína á alla hvítu kroppana hér í DK. Ég reyni að vera eins mikið úti og ég get, enda alveg ómögulegt að sitja inni í svona góðu veðri. Reyndar er svolítið erfitt að stitja úti í garði með allar bækurnar og glósurnar, því það hefur verið svolítill vindur og allt draslið því alltaf fjúkandi út um allt. En maður er nú ekki Íslendingur fyrir ekki neitt og ætti að geta þolað smá golu. Maður finnur bara eitthvað til að halda blaðsíðunum og glósunum á sínum stað, en svo þarf reyndar alltaf að færa draslið þegar maður flettir síðunum. En hvað leggur maður nú ekki á sig til að verða brúnn og sællegur!
